2012 -விகடன் விருதுகள் - சினிமா, இலக்கியம்

விகடன் விருதுகள் 2012

டாப் 10 திரைக்கதை 2012 - தமிழ் சினிமா

,

2012 ல நிறைய நல்ல படங்கள் வந்திருக்கு. அதுல  மக்கள் ரசிக்கத்தவறிய பல படங்கள் லிஸ்ட்ல இருக்கு. அதாவது படங்கள் குவாலிட்டியா இருந்தும் வசூல் ரீதியா  பிரமாதமா ஓடலை. இப்போ நாம பார்க்கப்போவது  நல்ல திரைக்கதை உள்ள படங்கள் லிஸ்ட் .

 இதுல அஜித்தின் பில்லா 2 , விஜய்யின் துப்பாக்கி மாதிரி மசாலா படங்கள் இடம் பெறாது .மாமூல் மசாலாக்கள் தவிர்த்து தமிழ் சினிமாவை அடுத்த கட்டத்துக்கு நகர்த்தும் நல்ல சினிமாக்கள் லிஸ்ட் இது .




இதுல புதுமையான விஷயம் கம் ஆச்சரியம் தரும் விஷயம் என்னான்னா  டாப் டென் படங்களில் 3 படங்கள் குறும்பட இயக்குநர்கள் 

காதலில் சொதப்புவது எப்படி? மீராவுடன் கிருஷ்ணா,லீலை,ஒரு கல் ஒரு கண்ணாடி,வழக்கு எண் 18/9, , ராட்டினம், மாலை பொழுதின் மயக்கத்திலே,நான் ஈ,அட்டகத்தி,நான்,சாட்டை,சாருலதா,பீட்சா,நடுவுல கொஞ்சம் பக்கத்தைக் காணோம்,நீர்ப்பறவை, பச்சை என்கிற காத்து ,தடையறத்தாக்க , மதுபானக்கடை என 18 படங்கள் நல்ல வித்தியாசமான திரைக்கதை உள்ள படங்கள்

 பச்சை என்கிற காத்து   வன்முறை ஓவர்  என்பதால் தகுதி இழக்குது , தடையறத்தாக்க  இன்னும் நல்லா பண்ணி இருக்கலாம் நீர்ப்பறவை  ஈழப்பிரச்சனை, மீனவப்பிரச்சனை பற்றி அதிகம் சொல்லாம குடிகாரர்களுக்கு எதிரான படமா திசை திரும்பினதாலும் , க்ளைமாக்ஸ் செய்ற்கையா இருந்ததாலும் அவுட். ராட்டினம் இன்னும் நல்லா பண்ணி இருந்திருக்கலாம் ,,  , நான் ஈ நேரடித்தமிழ்ப்பழம் இல்லை டப்பிங் என்பதால் அது தகுதி இழக்குது ( விகடனில் விமர்சனம் கூட போடலை ) மீராவுடன் கிருஷ்ணா  தேவை இல்லாமல் சைக்கோ கேரக்டர் மாதிரி காட்டி  இருப்பதால் அதையும் தள்ளிடலாம், மதுபானக்கடை முகம் சுளிக்க வைக்கும் காட்சிகள் இருக்கு , ரிஜக்டட்

10.   மாலை பொழுதின் மயக்கத்திலே - ஒரே ஒரு காபி ஷாப்ல ஒரு படத்தோட மொத்தக்கதையையும் சொல்ல துணிச்சல் வேணும். சில பல குறைகள் இருந்தாலும் மிகவும் நுணுக்கமான  மூளை இருந்தால் மட்டுமே இப்படி ஒரு ப்டம் எடுக்க முடியும்,இந்தப்பட ஹீரோயின் செம அழகு , ஆனால் பாவம் அல்பாயுசு , படம் ரிலீஸ் ஆகி சில மாதங்களில்  ஏதோ நோய் தாக்கி இறந்து விட்டார்.ஒரு லவ் ஜோடி புதுசா உருவாகுது , இன்னொரு மேரீடு ஜோடி பிரிவதற்காக அங்கே வந்து பின் சேர்ந்துடறாங்க . 2  செட் ஜோடி , காபி ஷாப் ஊழியர்கள் 2 பேர் , ஓனர்  மொட்தமே 5 பேர்தான் மெயின் கேரக்டர்ஸ். வெல்டன் ஒர்க்


பட விமர்சனம் படிக்க -http://www.adrasaka.com/2012/07/blog-post_6127.html



9. அட்டகத்தி -  கதைக்களம் ஒரு டவுன் பஸ் , கிராமத்துக்காதல் , மிக எளிய திரைக்கதை , பார்த்தேன் ரசித்தேன் பட பாதிப்பு ஆங்காங்கே இருந்தாலும்  இது நல்ல முயற்சி . பாடல்கள் படத்துக்கு மிகப்பெரிய பலம் , போஸ்டர் டிசைனில் கூட இயக்குநர் கைவண்ணம்


பட விமர்சனம் படிக்க - http://www.adrasaka.com/2012/08/blog-post_15.html




8. சாட்டை  -விஜய் டி வி ல வந்த 7 சி தொடரின் பாதிப்பில் வந்த படம் போல் தோற்றம் தந்தாலும் இது நம் சமூகத்துக்கு மிகவும் தேவையான சமூக சீர்திருத்தப்படம். ஒரு ஆசிரியர் எப்படி இருக்க வேண்டும் என்பதற்கான முன் உதாரணம். ஹீரோவின் நடிப்பு படத்தின் தரத்தை தூக்கி நிறுத்தியது . இயக்குநர் எந்த வித காம்ப்ரமைசும் செய்ய்யாமல் ( க்ளைமாக்ஸ் தவிர்த்து ) மிக பிரமாதமாக திரைக்கதை அமைத்திருந்தார் .படத்தில் வசனங்கள் கலக்கலாக இருந்தது


பட விமர்சனம் படிக்க - http://www.adrasaka.com/2012/09/blog-post_7166.html

 7. லீலை - இந்தப்படத்தின் பெரிய மைனசே டைட்டில் தான், நிறையப்பேரு இது ஏதோ கில்மாப்படம்னு நினைச்சுட்டாங்க . ஆனா இது ஒரு கண்ணியமான காதல் கதை , ஹீரோ புதுசு , ஹீரோயின் அழகு என்றாலும் மார்க்கெட்டிங்க் சரி இல்லாததால் மக்களை அதிகமா ரீச் ஆகலை



பட விமர்சனம் படிக்க - http://www.adrasaka.com/2012/04/blog-post_5558.html



6. காதலில் சொதப்புவது எப்படி?  -9 நிமிஷ குறும்படத்தை 2 மணி நேரப்படமா டெவலப் பண்றது தனி டேலண்ட் தான். காதலர்களுக்கு இடையே நுழையும் ஈகோ மோதல் தான் கதை . காதலர்கள் சின்ன சின்ன விஷயத்துக்கு எல்லாம் எப்படி சண்டை போட்டுக்குவாங்க என்பதை இதை விட அழகியலா சொல்லி விட முடியாது .




பட விமர்சனம் படிக்கhttp://www.adrasaka.com/2012/02/blog-post_18.html

5.  சாருலதா - பிரியாமணிக்கு லைஃப் டைம் படம் .ட்வின்ஸ்களை வெச்சு காமெடி , ஆள் மாறாட்டக்குழப்பங்கள்  , ஓவர் செண்ட்டிமெண்ட் பார்த்து சலிச்ச கண்களுக்கு இந்த க்ரைம் த்ரில்லர் புதுசு . மாற்றான் இதே கதை என்று சொல்லபப்ட்டதால் மக்கள் அதையே பார்த்துக்கலாம் என இதை தவிர்த்திருக்கலாம். ரிலீஸ் டைமிங்க் சரி இல்லை . ஆனா முக்கியமான படம் . க்ளைமாக்ஸ் ட்விஸ்ட் அபாரம் 

பட விமர்சனம் படிக்க

http://www.adrasaka.com/2012/09/blog-post_7975.html

4. நான்  -விஜய் ஆண்ட்டனிக்கு  மிகப்பெரிய திருப்பு முனைப்படம் , இதுல தான் அவர் அறிமுகம் ஆகறார். ஆனாலும் ஹாலிவுட் படங்களூக்கு இணையான க்ரைம் த்ரில்லர் . மக்கள் கவனிக்காததுக்கு முக்கியக்காரணம்  ஹீரோ புதுசு , மார்க்கெட்டிங்க் டெக்னிக்  சுமார் . மூளைக்காரன் ஒருத்தன் எப்படி எபப்டி எல்லாம் ஃபோர்ஜரி பண்றான் , எப்படி ஜெயிக்கிறான் எற ஆண்ட்டி ஹீரோ கதைதான் , ஆனா அபாரமான திரைக்கதை 

பட விமர்சனம் படிக்க 

http://www.adrasaka.com/2012/08/non-stop.html

3.  வழக்கு எண் 18/9 - இந்தக்கால கலாச்சார சீர்கேடுகளான ஆசிட் வீச்சு , தனக்கு கிடைக்காத ஃபிகர் வேற எவனுக்கும் கிடைக்கக்கூடாது  என்ற டீன் ஏஜ் இன் ஆண்ட்டி ஹீரோயிசங்களை ஆவணப்படுத்தி இருந்தார் . பேக் டிராப்பில்  ஏழை எளிய மக்களின் வாழ்க்கை முறை அருமையான  படமாக்கம் 

http://www.adrasaka.com/2012/05/18-9.html

2.  நடுவுல கொஞ்சம் பக்கத்தைக் காணோம் -கஜினி படத்துல ஏ ஆர் முருகதாஸ்  யூஸ் பண்ண ஷார்ட் டைம் மெமரி லாஸ் மேட்டரை அவர் க்ரைம் ஆக்‌ஷன் க்கு யூஸ் பண்ணார், அதே சப்ஜெக்ட்டை இவர் காமெடிக்கு யூஸ் பண்ணி இருந்தார் . இந்தக்கதையை சொல்லி படம் எடுக்கப்போறேன்னா யாரும் நம்ப மாட்டாங்க , ஆனா இயக்குநர் பட்டாசைக்கிளப்பி இருந்தார் . ஆனா ஏ செண்ட்டர் ரசிகர்களைக்கவர்ந்த  அளவு பி சி சரியாப்போகலை . கமல் , கிரேசி மோகன் சந்தானம் கூட்டணீயா இருந்தா கமர்ஷியலா போய் இருக்கும் , முக்கியமான படம் 

பட விமர்சனம் படிக்க 

http://www.adrasaka.com/2012/12/blog-post_8939.html

1. பீட்சா - நான் பல மொழிகளில் பல பேய்ப்படங்கள் பார்த்திருக்கேன் . ஆனா இந்தப்படம் மிரட்ன அளவு எந்தபப்டமும் மிரட்டுனதில்லை . 40 நிமிட டார்ச்லைட் ஷாட் கலக்கல் . க்ளைமாக்ஸ் ட்விஸ்ட்கள் அற்புதம்  . இது ஹாலிவுட்ல எடுத்தா அள்ளிக்கும் . தமிழ் சினிமாவின் மறக்க முடியாத படம், ஆனாலும் பிரமாதமான வெற்றி பெறவில்லை என்பதில் வருத்தமே  

பட விமர்சனம் படிக்க 

http://www.adrasaka.com/2012/10/blog-post_1749.html

a

diSki - தனிப்பட்ட முறையில் நான் மிகவும் ரசித்துப்பார்த்து சிரித்த படம் 

ஒரு கல் ஒரு கண்ணாடி ( ஓகே ஓகே )  -இதுவும் காதல் கதைதான், காலங்காலமாக வந்த ஒரு தலைக்காதல் கம் தறுதலைக்காதல்தான். ஆனா திரைக்கதைல  போர் அடிக்காம காட்சிகளை அமைச்ச விதம் பிரமாதம் , சந்தானம் தான் ஹீரோ , உதயநிதி அவருக்கு சப்போர்ட்டிங்க் கேரக்டர். சிரிக்க சிரிக்க கதை சொல்லும் விதம் அழகு . இந்தப்படம் ரிலீஸ் ஆகும் முன் வந்த டி வி விளம்பரங்கள் படத்துக்கு பெரும்பலம்.  இந்த ஆண்டின் சிற ந்த  மார்க்கெட்டிங்க் டெக்னிக் என்று ஒரு விருது இருந்தா இதுக்கு தரலாம். அதே போல் இந்த ஆண்டின் சிறந்த பொழுதுபோக்குசித்திரம் விருதும்

பட விமர்சனம் படிக்க - http://www.adrasaka.com/2012/04/blog-post_228.html

2012 - டாப் 10 அழகிகள்

உலக நாயகிகள்!

ஆ. அலெக்ஸ் பாண்டியன்

ஹாலிவுட்டில் ஏஞ்சலினா ஜோலிகளை ஓரங்கட்டிவிட்டது அழகிகள் படை. உலகின் டாப் செக்ஸி லிஸ்ட், பியூட்டி லிஸ்ட், காஸ்ட்லி லிஸ்ட் என அனைத்துப் பட்டியல்களிலும் இடம் பெற்றிருக்கும் டாப் 10 பட்டாம்பூச்சிகளின் இனிய இன்ட்ரோ இங்கே... 


செலினா கோம்ஸ்

'ஸ்பை கிட்ஸ்’ படம் மூலம் சின்னதாக அறிமுகமாகி, பரபர வளர்ச்சி அடைந்து 20 வயதுக்குள்ளாகவே 'வுமன் ஆஃப் தி இயர்’ பட்டம் வென்ற ஏஞ்சல். ஆரம்பத்தில் சின்னச் சின்ன கதாபாத்திரங்களில் தலை காட்டி வந்தவருக்கு 'விசார்ட்ஸ் ஆஃப் வேவர்லி பிளேஸ்’ படம் பெரிய பிரேக்.  இடையில் பாப் பாடகர் ஜஸ்டின் பைபருடனான இரண்டு வருட டேட்டிங், பிரிவு, மீண்டும் காதல் எனக் காதல் பஞ்சாயத்துக்கும் பஞ்சம் இல்லை. பெண்களுக்கு எதிரான வன்முறையைத் தடுக்கும் இயக்கத்தில் ஈடுபாடு காட்டும் செலினா, 'ப்யூர் லவ் வெயிட்ஸ்’ என்ற எழுத்துக்கள் பொறித்த மோதிரத்தை அணிந்திருக்கிறார். யார் எங்கே காத்திருக்கிறார்களோ!
வெனஸா ஹட்ஜென்ஸ்

எட்டு வயதிலேயே மேக்கப் போட்டு போஸ் கொடுக்க ஆரம்பித்த வெனஸா, 'பலானா பலான’ விஷயங்களில் பிரபலம். படுக்கையறையில் அவரை அவரே எடுத்துக்கொண்ட செம செக்ஸி படங்கள் இணையத்தில் வெளியாகி பரபரப்பு ஏற்படுத்த, அதுவரை அவர் நடிப்பதற்கென கமிட் ஆகியிருந்த படங்களில் இருந்து கழட்டிவிடப்படும் நிலை உண்டானது. ''அது என் அனுமதி இல்லாமல் வெளியான படங்கள். எக்ஸ்கியூஸ்மீ!'' என்று சமாளித்தார் ஐஸ்க்ரீம் அழகி. படங்களை லீக் செய்தது யார் என்பதை அறிய எஃப்.பி.ஐ. ஆட்கள் விசாரிக்க வந்ததெல்லாம் டாப்பிக்கல் தகராறு. ஹாலிவுட்டின் பிரபலப் பத்திரிகைகளின் அட்டைப் படங்களை அலங்கரித்திருக்கும் வெனஸா, 22 வயதுக்குள் வாழ்க்கையின் எல்லா இன்ப துன்பங்களையும் அனுபவித்துவிட்டதாக அலுத்துக்கொள்கிறார். ''வாழ்க்கை போரடிக்கிறது!'' என்று அடிக்கடி சொல்பவர், அப்படி உணரும் தருணங்களில் தனது காமாசோமா வீடியோக்களை இணையத்தில் அப்லோடுவார். அதை முழுக்கப் பார்த்து ரசித்துவிட்டு, மறக்காமல் திட்டிக் குவித்துவிடுவார்கள் இணைய தலைமுறையினர்!
விக்டோரியா ஜஸ்டிஸ்

கிறங்கடிக்கும் அழகையும் தாண்டி உருகவைக்கும் கேரக்டர், விக்டோரியா ஜஸ்டிஸ். நடிப்பு மீது இவருக்கு இருந்த தீராக் காதலால், இவரது குடும்பமே லாஸ் ஏஞ்சல்ஸ் நகருக்குக் குடிபெயர்ந்தது. குடும்பத்தின் நம்பிக்கையைப் பொய்க்காமல் நடிக்கத் துவங்கி, இப்போது வருடம் மும்மாரி விருது மழை பொழிகிறது. பன்னிரண்டாவது வயதிலேயே 'சிறந்த நடிகை’ விருது தட்டியிருக்கிறார். ''என் 17 வயதில் எனக்கு இருந்த சுதந்திரமான சூழல் இப்போது பல பெண்களுக்குக் கிடைப்பது இல்லை. அதை அவர்களுக்கு உருவாக்குவதற்காகப் பாடுபடுவேன்!'' என்று சொல்லி பெண்கள் முன்னேற்றத்துக்காக அமெரிக்கா முழுக்கச் சுற்றுகிறார். ''உங்கள் கனவைச் சிதைக்க யாருக்கும் அனுமதி அளிக்காதீர்கள்!'' - இதுதான் விக்டோரியாவின் வேதம்.
எம்மா ஸ்டோன்

பச்சைக் கண் பளிங்குப் பொண்ணு. 'தி அமேஸிங் ஸ்பைடர்மேன்’ படத்தில் நடித்ததன் மூலம் அதீத லைம்லைட் பெற்றவர். சினிமாவுக்கு வரவில்லை என்றால், பத்திரிகையாளர் ஆகியிருப்பேன் என்று சொல்பவர், கடந்த ஒரு வருடமாக 'ஸ்பைடர் மேன்’ பட ஹீரோவுடன் கோயிங் ஸ்டெடி. கூந்தலை பிரவுன், சிவப்பு என விதவிதமாக நிறம் மாற்றிக்கொள்வது இவருக்குப் பிடித்த பொழுதுபோக்கு.
ஜெனிஃபர் லாரன்ஸ்

'மிகவும் திறமையான இளம் நடிகை’ என்று ஜெனிஃபரை அமெரிக்கா கொண்டாடுகிறது. 'எக்ஸ் மேன்’, 'தி ஹங்கர் கேம்ஸ்’ படங்களில் அதிரடி செய்ததன் மூலம், 'எப்போதைக்குமான ஆக்ஷன் ஹீரோயின்’ என ஃபோர்ப்ஸ் பத்திரிகையால் பாராட்டப் பெற்றிருக்கிறார். ஹாலிவுட் நடிகர் நிக்கோலஸுடன் தேவதைக்குக் காதல். 'உலகிலேயே என்னை அதிகம் சந்தோஷப்படுத்தக்கூடிய மனிதர் நிக்கோலஸ்தான்!’ என 'உருகுதே மருகுதே’கிறார்!
க்ரிஸ்டன் ஸ்டூவர்ட்

க்ரிஸ்டன் ஸ்டூவர்ட் என்பதைவிட 'பெல்லா’ என்றால் உலகமே பாசப் பார்வை பார்க்கும். டிராகுலா கதையான ட்வைலைட் படங்கள் மூலமாக உலகப் பிரபலம் அடைந்த ஹோம்லி ஏஞ்சல். தனது 19-வது வயதில்தான் ஹைஸ்கூல் படிப்பையே முடித்தார். ட்வைலட் பட நாயகன் ராபர்ட்டுடன் இவருக்கு நிஜத்திலும் வளர்ந்த காதல் உலகம் அதிகம் விவாதிக்கும் அந்தஸ்து பெற்ற செய்தி. இப்போது க்ரிஸ்டன் பிற ஆண்களுடனும் கெமிஸ்ட்ரி பாராட்டுவதால், இருவருக்கும் இடையே லடாய்... கடாய்!
மேகன் ஃபாக்ஸ்

ஐந்து வயதில் மேடை நாடகத்தில் தொடங்கிய கலைச் சேவை, பதின்பருவ வயதுகளில் பல மில்லியன்கள் சம்பளம் வாங்கும் அளவுக்குக் கொண்டுவந்திருக்கிறது. டிரான்ஸ்ஃபார்மர்ஸ், ஜெனிஃபர்ஸ் பாடி படங்களில் நடித்ததன் மூலம் சர்வதேசக் கவனம் ஈர்த்தவர். உடல் முழுக்க விதவிதமாக டாட்டூ குத்திக்கொள்பவர், காதலன் பிரையன் க்ரீனின் பெயரை இடுப்பில் பதித்திருக்கிறார். வால் மார்ட் கடை ஒன்றில் ஷாப்பிங் செய்யும்போது சில மேக்கப் அயிட்டங்களைத் திருடி, மாட்டிக்கொண்டு முழித்தது மேகனின் சாதனைகளுள் ஒன்று!
டக்கோடா ஃபேன்னிங்

'தெய்வத் திருமகள்’ படத்தின் ஒரிஜினல் 'ஐ யாம் சாம்’ படத்தில் குட்டி நிலாவாக நடித்த பியூட்டி. ''இயக்குநர் ஆக வேண்டும் என்பதே லட்சியம்'' என்று சொல்லும் டக்கோடா, இப்போதும் செல்லும் இடங்களில் எல்லாம் பொம்மைகளை வாங்கிக் குவிக்கிறார். 'இவ்வளவு கலாட்டா செய்கிறீர்கள். ஆனால், 'ஐ யாம் சாம்’ படத்தில் எப்படி அவ்வளவு சீரியஸாக நடித்தீர்கள்?’ என்று கேட்டதற்கு, 'நான் வளர்க்கும் தங்க மீன் இறந்துவிட்டதாக நினைத்துக்கொள்வேன். கண்ணீர் பொலபொலவென வந்துவிடும்!'' என்றார் சமத்தாக!
அன்னா சோபியா ராப்  

படிப்பைப் பாதியிலேயே விட்டுவிட்டு, 'சினிமா... சினிமா’ என அழுது அடம்பிடித்து நடிக்க வந்தாலும், 42 ஆடிஷன்களுக்குப் பிறகும் சினிமா கதவு திறக்கவே இல்லை அன்னாவுக்கு. இப்போது அன்னாவின் கால்ஷீட் 2015 வரை ஃபுல். 'சார்லி அண்ட் தி சாக்லேட் ஃபேக்டரி’ இவரது லேட்டஸ்ட் ஹிட். இவர் அணியும் எந்த ஆடையையும் சிலாகித்து வர்ணித்துப் போற்றிப் பாராட்ட பெரும் கும்பல் உண்டு இணையத்தில். குழந்தைத்தனம் மாறாத முகத்தாலேயே பலரைக் கவர்ந்த அன்னாவை டூ-பீஸ் ஆடையில் பார்க்க அவரது ரசிகர்கள் ஆர்வம் காட்டுவது இல்லை. அதனாலேயே இப்போதெல்லாம் டவுசர் சட்டை தாண்டி, கவர்ச்சி எல்லை தாண்டுவதே இல்லை.
எல்லி ஃபேன்னிங்

'ஐ யாம் சாம்’ புகழ் டக்கோடா ஃபேன்னிங்கின் அன்புத் தங்கை எல்லி. ஹாலிவுட்டின் மிக மிகக் குட்டிப் பாப்பா ஹீரோயின். ஹாலிவுட் சினிமா வரலாற்றில் முதல் முறையாக மூன்றரை வயதிலேயே பிரீமியர் ஷோவில் கலந்துகொண்ட ஹீரோயினான இவருக்கு இப்போது வயது 14. தனது ஏழாவது பிறந்த நாளுக்கெல்லாம் தனது மொத்தக்  குடும்பத்தையும் தனது செலவில் ஆஸ்திரேலியா டூர் அழைத்துச் சென்றவர். சினிமாவில் ஒன்றாகப் பயணம் துவக்கி இப்போது வெவ்வேறு பாதையில் அக்காவும் தங்கையும் பிரிந்துவிட்டார்கள். ஆனாலும், இப்போதும் எனக்குப் பிடித்த நடிகை என எல்லி சொல்வது அவரது அக்காவைத்தான்!



நன்றி - விக்டன் 

2012 - டாப் 10 மண்ணின் மைந்தர்கள்

2012 டாப் 10 மனிதர்கள்

விகடன் டீம்

போராட்டத்தின் மைந்தர்கள்!

தங்கள் மண்ணையும் மக்களையும் காக்கப் பொங்கி எழுந்த இடிந்தகரை கடல் மைந்தர்களைத் தேசமே திரும்பிப் பார்த்தது. உண்மையான மக்கள் போராட்டம் எப்படி இருக்க வேண்டும் என்பதை உலகுக்கு நிகழ்த்திக் காட்டியது, இந்தியாவின் தென்கோடிக் கிராமமான இடிந்தகரை. பொட்டல் மண்ணில் சிறு பொறியாகத் துவங்கிய அணு உலைக்கு எதிரான முழக்கத்தை வரலாறாக வளர்த்தெடுத்தனர் இந்த ஏழை மக்கள். 'பணம் வாங்கிக்கொண்டு போராடுகின்றனர்’ என்று பிரதமர் வரை குற்றம்சாட்டியபோதும், துவளவில்லை ஜனத்திரள்.


 பேச்சுவார்த்தைகள், பேரம், தேசத்துரோக வழக்குகள், குண்டர் சட்டக் கைது கள், கண்ணீர் புகைக்குண்டு வீச்சு, தடியடிகள் என அரசின் அத்தனைத் தந்திரங்களையும் தவிடு பொடியாக்கியது போராட்டக் குழு. நாளாக நாளாக இவர்கள் நெஞ்சுரம் பெறுவதால், கனல்கிறது போராட்ட நெருப்பு. உண்ணாவிரதப் பந்தலில் பீடி சுற்றியபடியே, அணு உலை அரசியல் பேசும் மூதாட்டியே இதற்கு சரித்திரச் சாட்சி. தங்கள் மண்ணுக்காக மட்டுமல்ல...



ஈழம், முல்லைப் பெரியாறு, மூவர் தூக்கு என இதர சமூகப் பிரச்னைகளுக்காகவும் போராடும் இந்த சமூகப் போராளிகள் நம் ஒவ்வொருவருக்குமான உதாரணங்கள். ஒருவேளை இடிந்தகரை மக்களின் போராட்டம் கடந்தும் கூடங்குளம் அணு உலை செயல்படத் தொடங்கலாம். ஆனால், இனி இந்தியாவின் எந்தப் பிரதேசத்திலும் மாபெரும் மக்கள் போராட்டத்தை எதிர்கொள்ளாமல் அணு உலை அமைப்பதற்காக ஒரு சிறு கல்லையும் அசைக்க முடியாது. அதுதான் இடிந்தகரை மக்களின் உண்மையான வெற்றி!


இ மெயில் தமிழன்!  

'இ மெயில் கண்டுபிடித்தவர்’ என்று இன்று உலகமே கொண்டாடும் சிவா அய்யாதுரை, ராஜபாளையம் தமிழன் என்பது நமக்கான பெருமை. 1978-ல் அமெரிக்காவில் படித்தபோது, தனது 14 வயதில் இவர் இ மெயிலைக் கண்டுபிடித்தது அறிவுலக ஆச்சர்யம். 1982-ல் அமெரிக்க அரசிடம் இருந்து, உலகின் முதல் இ மெயில் காப்பிரைட்ஸ் பெற்றார்.



ஆனால், தொழில்நுட்ப வளர்ச்சியில் பெரும் கார்ப்பரேட் நிறுவனங்கள் இணையத்தைக் கட்டுப்படுத்த, யார் யாரோ இ மெயிலுக்குச் சொந்தம் கொண்டாடினார்கள். அறிவாயுதம் ஏந்திப் போராடினார் சிவா. உண்மை வென்றது. இ மெயில் மட்டும் இல்லாமல், அமெரிக்கத் தபால் துறையின் மறுமலர்ச்சிக்கும் காரணமானவர். அமெரிக்க அதிபரின் வெள்ளை மாளிகை, இவரது நிறுவனம் ஒன்றின் சேவை பெறும் வாடிக்கையாளர். இந்திய அறிவியல் துறையின் ஊழல்கள்குறித்து இவர் எழுதிய கடிதம், நம் தேச நலனுக்கான ஆராய்ச்சி மணி. 'புதுமைகளை எந்த நேரத்திலும், எந்த இடத்திலும், யாராலும் செய்ய முடியும்’ என்கிற சிவா, தமிழர்களின் பெருமைமிகு அடையாளம்!


அறிவியல் தமிழச்சி!

அரியலூரில் பிறந்து, ஆச்சர்ய உயரங்கள் தொட்ட இஸ்ரோ சயின்டிஸ்ட் வளர்மதி. தேசிய அளவில் திட்ட இயக்குநர் பதவியை வகிக்கும் இரண்டாவது பெண். செயற்கைக்கோள் செலுத்துதல் போன்ற அதிநவீன அறிவியல் துறையில் தமிழ்ப் பெண்கள் எட்டிப்பார்க்காத நிலையில், வளர்மதி இந்தியாவின் முதல் சுயேச்சை உளவு செயற்கைக்கோள் ரிசாட் 1-ன் திட்ட இயக்குநர் ஆனது அற்புதமான சாதனை.



அயராத உழைப்பும் தேடலுமாக அவர் கால் நூற்றாண்டுக்கு முன்னரே சென்ற பயணம் இளைய தலைமுறைக்கான பாடம். 1984-ல் இஸ்ரோ வில் ஓர் ஆராய்ச்சியாளராகச் சேர்ந்து, செயற்கைக்கோள் திட்டப் பொறியாளர், திட்ட மேலாளர், துணைத் திட்ட இயக்குநர், இணைத் திட்ட இயக்குநர் எனப் படிப்படியாக உயர்ந்து, 2012-ல் 'ரிசாட் 1-’ன் திட்ட இயக்குநராக உச்சம் தொட்டார்.



 இந்தியா ஏவிய செயற்கைக்கோள்களிலேயே அதிக எடைகொண்டது ரிசாட் 1. விமானங்கள்கூட ஊடுருவ முடியாத அடர் வனங்கள், குகைகள், நீர்ப்பரப்புகளைப் படம் எடுக்கும் திறன் கொண்ட செயற்கைகோள் அது. ஆனால், இந்தச் சாதனையின் எந்தச் சுவடும் இல்லாமல், 'நம் தேசத்தின் கனவுகளை நனவாக்குவதே இலக்கு. இன்னும் நிறைய வேலை இருக்கிறது’ என எளிமை பேசுகிறார் இந்த முன்னுதாரணத் தமிழச்சி!


வணக்கத்துக்குரிய வாத்தியார்!

தடகள விளையாட்டுகளில், தமிழ் வீரர்களைச் சர்வதேச உயரத்துக்கு இட்டுச் செல்லும் ஏகலைவன்... சென்னையைச் சேர்ந்த நாகராஜ். கேரள அரசின் கோடிக்கணக்கான நிதி உதவியுடன் செயல்படும் பி.டி.உஷா அகாடமியில் இருந்து, இதுவரை உருவானது இரண்டு சர்வதேசத் தடகள வீரர்கள் மட்டுமே. ஆனால், எந்த அரசு உதவிகளும் இல்லா மல், நாகராஜ் இதுவரை 24 சர்வதேச வீரர்களை உருவாக்கி இருப்பது மகத்தான சாதனை.


அதில் 14 பேர் சர்வதேச சாம்பியன்கள். 100-க்கும் அதிக மானோர் தேசியத் தடகளச் சாம்பியன்கள். இவை அனைத்தையும் எதிர்பார்ப்புகள் எதுவும் இல்லாமல், தேசத்தின் மீதும் விளையாட்டின் மீதும் உள்ள காதலால் செய்கிறார் நாகராஜ். மாநிலம் முழுவதும் விளையாட்டுப் போட்டிகள் நடக்கும் இடங் களுக்கு அலைந்து திரிந்து, தகுதியும் ஆர்வமும் உள்ள மாணவர்களைத் தேடிப் பிடித்து வந்து பயிற்சி அளிப்பதை, கடந்த 25 ஆண்டுகளாக ஒரு தவம்போல் செய்து வரும் நாகராஜின் கனவு, தமிழ்நாட்டில் இருந்து பல ஒலிம்பியன்களை உருவாக்க வேண்டும் என்பதுதான். நடக்கும் நாகராஜ்!



சளைக்காத சட்டப் போராளி!

கூடங்குளம் அணுமின் நிலையத்துக்கு எதிராகச் சட்டச் சாட்டை சுழற்றும் போராளி 'பொறியாளர்’ சுந்தர்ராஜன். 'பூவுலகின் நண்பர்கள்’ அமைப்பைச் சேர்ந்தவர். 'அணு உலைக்கு 1989-ல் வாங்கிய சுற்றுச்சூழல் அனுமதி, 2011-க்கும் பொருந்தும்’ என்று சொன்ன அணுசக்தி ஒழுங்குமுறை ஆணையத்தை எதிர்த்து, உயர் நீதிமன்றத்தில் இவர் தொடர்ந்த வழக்கில்தான் கூடங்குளம் அணு உலைக்கு எதிரான போராட்டம் வலுப்பட்டது.



'ஜப்பான் - ஃபுகுஷிமா அணு உலை விபத்துக்குப் பிறகு, அணுசக்தி ஆணையம் அமைத்த குழு பரிந்துரைத்த 17 வகையான பரிந்துரைகளை நிறை வேற்றாமல் கூடங்குளம் அணு உலையைத் திறக்கக் கூடாது’ என இவர் தொடர்ந்த வழக்கில்தான், 'அணுக் கழிவுகளை ஏழு ஆண்டுகளுக்கு கூடங் குளத்திலேயே வைத்திருப்போம்’ என்று முதல் முறையாக அணுக் கழிவுகளைப் பற்றி வாய் திறந்தது அணுசக்தி ஆணையம். இந்தியாவின் முதல் 1,000 மெகாவாட் அணு உலையான கூடங் குளம் உலையில் விபத்து ஏற்பட்டால், அதற்கான நஷ்டஈடு கொடுப்பதில் இருந்து ரஷ்ய நிறுவனத்துக்கு விலக்கு அளிக்கப்பட்டதை எதிர்த்தும் வழக்கு நடத்திவரும் கலகக்காரர். நன்றி நண்பரே!


விவசாயக் காதலன்!

இந்திய விவசாயிகளின் நலனுக்காக கால் நூற்றாண்டாகத் தீவிரமாக இயங்கிவரும் 'அறச்சலூர்’ செல்வம், நம் பூமி நேசன். இயற்கை விவசாயம் பரப்புதல், மரபணு மாற்றுப் பயிர்கள் இல்லாத இந்தியாவை உருவாக்குவது என்கிற தளங்களில் இவரது பணிகள் வணங்கத்தக்கவை.


விவசாயிகளுக்கும் பள்ளி, கல்லூரி மாணவர்களுக்கும் இயற்கை விவசாயம், செயற்கை உரங்களின் கேடுகள் பற்றிய விழிப்பு உணர்வுப் பயிற்சி வகுப்புகள் நடத்திவருகிறார். 'கான் உலா’ என்ற பெயரில் 125 பள்ளி மாணவர்களை, வனப் பகுதிகளுக்கு அழைத்துச் சென்று இயற்கையின் ஸ்பரிசத்தை, முக்கியத்துவத்தை உணரச் செய்கிறார். மரபணு மாற்றப்பட்ட 'மான்சான்டோ’ நிறுவனத்தின் விதைகளை, சோதனை முறையில் கோவை வேளாண் பல்கலை யில் பயிர் செய்தபோது, வளாகத்தினுள் சென்று இவர் நடத்திய போராட்டம் அதிகாரத்தைத் திகைக்கவைத்தது.


 மிரண்டுபோன 'மான்சான்டோ’ நிறுவனம் செல்வத்தை அமெரிக்காவுக்கு அழைத்துச் சென்று, தங்கள் ஆராய்ச்சி நிறுவனங்களைச் சுற்றிக்காட்டி இவரை வளைக்கப் பார்த்தது. திரும்பி வந்தவர், 'உலகெங்கிலும் இருக்கும் விவசாய நிலங்கள் அனைத்தும் தன் கட்டுப்பாட்டில் இருப்பதற்கான வேலைகளில் தீவிரமாக இருக்கிறது மான்சான்டோ. விதைகளுக்கான பேடன்ட் பெறுவதில் பேய்த்தனமாக இயங்குகிறார்கள். விதைகளைக் கடையில் இருந்து வாங்குகிறீர்கள் என்றால், உங்கள் நிலம் கைவிட்டுப்போகிறது என்று அர்த்தம். எனவே, விதை நெல்லை நீங்களே உருவாக்கிக்கொள்ளுங்கள்!’ என்று களப் போராளியாக முழங்கினார். செல்வத்துக்கு தமிழ் மண் கடமைப்பட்டிருக்கிறது!


அசத்தல் அதிகாரிகள்!

மோசமான செயல்பாடுகளால் சிதைந்துகிடந்த தமிழ்நாடு அரசுப் பணியாளர் தேர்வாணையத்தை (டி.என்.பி.எஸ்.சி.) தூக்கி நிறுத்தியது ஆர்.நட்ராஜ் - உதயச்சந்திரன் கூட்டணி. லஞ்சம் கொடுத்தால், சிபாரிசு இருந்தால் மட்டுமே அரசு வேலை என்றிருந்த நிலையை அதிரடியாக மாற்றி அமைத்தார் உதயச்சந்திரன். நடைமுறை மோசடிகளை வேரறுக்கப் புதிய விதிமுறைகளைக் கொண்டுவந்தார்.


அதன் அடிப்படையில் லஞ்ச ஒழிப்புத் துறை உள்ளே புகுந்து, தேர்வாணையத் தலைவர் உள்ளிட்டோரைப் பந்தாடியது. ஓய்வுபெற்றிருந்த ஆர்.நட்ராஜ் தேர்வாணையத் தலைவராக நியமிக்கப்பட்டார். ஆன்லைன் விண்ணப்பம், தேர்வு எழுதி முடித்த மறுநாளே விடைகளை ஆன் லைனில் வெளியிடுவது, வரும் ஆண்டுக்கான தேர்வு அட்டவணைகள், வெளிப்படையான, நேர்மையான நிர்வாகம் என லட்சோபலட்சம் தமிழக இளைஞர்களின் மனதில் நம்பிக்கை ஒளியேற்றியது இந்தக் கூட்டணி. இடையில், உதயச்சந்திரன் மாற்றலானாலும் சீரான நிர்வாகத்தைத் தக்கவைத்தார் நட்ராஜ். அவ்வளவு கெடுபிடியிலும் குரூப்-2 வினாத்தாள் வெளியானதாகச் சர்ச்சை கிளம்பியபோது, தமிழகத் தேர்வாணைய வரலாற்றில் முதல்முறையாக நடந்து முடிந்த தேர்வை அதிரடியாக ரத்து செய்தார் மீசைக்காரர். நேர்மைப் பவனி தொடரட்டும்!


இதயம் உலுக்கிய இயக்குநர்!

காதலும் மனிதமும் பேசும் பாலாஜி சக்திவேலின் திரைப்படங்கள், தமிழ் சினிமாவுக்கு அவசிய ஆக்சிஜன். 'காதல்’ படத்தில் விடலைக் காதலின் ஜன்னல் வழியே சாதியின் கோரத்தையும் அன்பின் ஈரத்தையும் காட்டியபோது, தடதடத்தது தமிழ்த்திரை.



'வழக்கு எண் 18/9’-ல் பாலாஜி தொட்டது இன்னும் உயரம். நலியும் விவசாயம், குழந்தைத் தொழிலாளர் கொடுமை, பெண்களின் பாதுகாப்பு, காவல் துறையின் அராஜகம், அரசியல் அதிகாரத் துஷ்பிரயோகம், நாட்டுப்புறக் கலைகளின் அழிவு, வக்கிர இளைஞர்களின் மொபைல் கலாசாரம், எளிய மனிதர்களின் பேரன்பு... என 'வழக்கு எண்’ பேசியது அபாரமான திரைமொழி அரசியல். '



5-டி’ என்ற புகைப்பட கேமரா தொழில்நுட்பத்தில், மிகக் குறைந்த செலவில் முழுத் திரைப்படத்தையும் எடுத்தது, இன்னொரு சாதனை. எந்த சமரசங்களும் இல்லாமல், எளிய மனிதர்களின் வாழ்க்கையைத் துணிந்து பேசும் இந்த திண்டுக்கல்காரரின் திரைப்படங்கள் இந்த மண்ணுக்கானவை... மக்களுக்கானவை!




நம்பிக்கைத் தோழி!

எழுத்து, நாடகம், ஆவணப்படம் எனக் கலைகளின் வழியே திருநங்கைகளின் மேம்பாட்டுக்காகப் போராடிக்கொண்டே இருப்பவர் ப்ரியா பாபு. இந்த சேவைகளுக்காக பாரதிதாசன் பல்கலைக்கழகத்தின், 'பெரியார் விருது’ வென்றவர். 2004-ல் இவர் தொடர்ந்த வழக்கின் மூலமாகவே, திருநங்கைகளுக்கு வாக்காளர் அடையாள அட்டை கிடைத்தது. தொடர்ந்து, செங்கல்பட்டில் திருநங்கைகளுக்கு அரசு வீடு பெற்றுத் தந்தது, 'கண்ணாடி கலைக் குழு’ மூலம் பிரசாரம் செய்வது என இவர் திரி தீண்டிவைத்த விளக்குகள் ஏராளம்.



திருநங்கைகள் குறித்த எழுத்துக்கள், குறும்படங்கள்,
பி.ஹெச்டி. ஆய்வறிக்கைகள் என்று சிதறிக் கிடக்கும் பதிவுகளைத் தொகுக்கும், 'பாலியல் சிறுபான்மையினருக்கான நூலகம்’ உருவாக்கு வது ப்ரியாவின் கனவுத் திட்டம். எல்லாக் கனவுகளும் நனவாகட்டும்!



அர்ஜுனா அழகி!

தமிழக விளையாட்டுத் துறையின் பெருமிதம், தீபிகா பல்லிகல். கொஞ்சம் வெற்றி, நிறையத் தோல்வி என ஜிக்ஜாக் கிராஃபில் இருந்த தீபிகா, இந்த ஆண்டு வெடித்துக் கிளம்பினார். ஆறு முறை உலக சாம்பியன் பட்டம் பெற்ற சாரா ஃபிளிட்ஸ் ஜெரால்டிடம் பயிற்சி பெற்ற பின், தீபிகா ஆடியது எல்லாமே வெற்றி வேட்டை. இதுவரை எந்த இந்திய வீராங்கனையும் போகாத 'டோர்னமென்ட் ஆஃப் சாம்பியன்ஸ்’ போட்டியில் முதல்முறையாகக் கால்வைத்தார்.



 அர்ஜுனா விருது பெற்றது, சர்வதேச விஸ்பா ரேங்கிங்கில் 10-வது ரேங்கிங் குக்குள் கால்வைத்த முதல் இந்திய ஸ்குவாஷ் வீராங்கனை எனக் குவிந்தன பெருமைகள். 21 வயதுக்குள் ஜெர்மன் ஓப்பன், டச் ஓப்பன், ஃப்ரெஞ்ச் ஓப்பன், ஆஸ்திரேலியன் ஓப்பன், ஸ்காட்டிஷ் ஓப்பன், ஈரோப்பியன் ஜூனியர் ஸ்குவாஷ் சர்க்யூட் என ஆறு பட்டங்களை வென்ற வர், இன்னும் இன்னும் உயரம் தொடுவார் என்பது நன்னம்பிக்கை! 


நன்றி - விகடன்

2012 - டாப் 25 கலக்கல் காமெடிகள்

2012 டாப் 25 பரபரா

விகடன் டீம்

ஓவியங்கள் : கண்ணா

இருட்டுக்கடை அல்வா!

'1997-ல் மின்சாரக் கனவு... 2012-ல் மின்சாரமே கனவு’ என்று பப்ளிக்கை டெரர் கவிதை வாசிக்கவைத்தது பவர்கட். 'நான் ஆட்சிக்கு வந்தால், மூன்றே மாதங்களில் மின்வெட்டுப் பிரச்னையைத் தீர்ப்பேன்’ என்று முழங்கிய ஜெயலலிதா 'பவர்’ வந்ததும், பவர்கட்டை மறந்துபோனார். 14 மணி நேரம் 16... 18 என எகிறிக்கொண்டே போக, அத்தனை பேரும் 'பவர் ஸ்டார்’களாகி கிறுக்குப் பிடித்துத் திரிந்தார்கள். ''மின்வெட்டுப் பிரச்னை இவ்வளவு சீரியஸாவா இருக்கு? யாருமே என்ட்ட சொல்லவே இல்ல...'' என்ற ஜெ-வின் ரியாக்ஷன் அதிபயங்கர ஷாக். ஆற்காட்டாரிடம் மன்னிப்புக் கேட்டு ஆங்காங்கே போஸ்டர் ஒட்டிய தமிழன், பவர்கட் ஜோக்குகள் படித்துச் சிரித்தது அவலச் சுவை. '25 மணி நேர மின்தடை’ என்று தமிழ்நாடு மின்சார வாரியத்தில் யாரோ ஆஃப் அடித்துவிட்டு அறிவிக்க, 'அடிடா அவனை’ என்று ஈ.பி. அலுவலகங்களைத் தாக்கி, மறியலில் அமர்ந்தார்கள் சிறு, குறு தொழிலாளர்கள். சீரியல்களுக்கு டி.ஆர்.பி. குறைந்ததில் இருந்து ஏகப்பட்ட தொழில் நசிவு வரை பிரச்னை எகிறி அடிக்க, 'மழை பெய்யும்போது மின் கம்பங்களுக்கு அருகே மக்கள் செல்ல வேண்டாம்!’ என்று மின் வாரியம் இருட்டுக்கடை அல்வா கிண்டியதில், கிறுக்குப் பிடித்தது தமிழகம்!



'முன்னாள்’ அஞ்சா நெஞ்சன்!



அஞ்சா நெஞ்சன்தான் இந்த வருடத்தின் பஞ்ச்சர் நெஞ்சன். 'இடப் பற்றாக்குறை’ என அழகிரியின் மதுரை எம்.பி. அலுவலகத்தை நெம்பி எடுத்தார்கள். 'நானும் வருவேன்... ஆட்டையக் கலைப்பேன்’ என்று ஸ்டாலின் நெல்லை வரை வந்து தொல்லை கொடுக்க, 'இளைஞர் அணிப் பதவி நியமனங்களில் என்னுடைய சிபாரிசுகளைக் கட்சி மேலிடம் ஏற்கவில்லை’ என்று கோனார் கடையில் இருந்து குரூப் மெசேஜ்கள் அனுப்பினார் அழகிரி. 'மலையைக் காணோம்!’ என்று மதுரை அலற, 'மகனைக் காணோம்!’ என்று அலறினார் அப்பா. பிரஸ்ஸைப் பார்த்தாலே பிரஷர் எகிறுபவர், 'துரையின் முன் ஜாமீன் மனு மீதான விசாரணைமுடியும் வரை அவரைக் கைதுசெய்யக் கூடாது!’ என 'டூ மினிட்ஸ் நூடுல்ஸ் பேட்டிகள்’ தட்டினார். துரையைத் தேடிபோலீஸ் நுரை கக்க, அழகிரிக்கு கருணாநிதி தினமும் 108 மிஸ்டு கால்கள் கொடுத்தார். போலீஸ், அமெரிக்க மருமகனுக்குச் சம்மன் அனுப்பி அதிர்ச்சி வைத்தியம் கொடுத்ததில், ஆண்டர்சன் பந்துக்குப் பம்மும் சச்சின் மாதிரி ஆனார் கிரிகிரி. உள் கட்சிக் கொசுக்கடியில் சிக்கியது, பிரதமர் கொடுத்த விருந்துக்குப் போகாமல் அடடே 'டயட்’டில் இருந்தது, ஒப்பணக்கார வீதியில் ஸ்போக்கன் இங்கிலீஷ் க்ளாஸ் போனது... என ஏகப்பட்ட பல்புகளுக்கு நடுவே, மகனுக்கு முன் ஜாமீன் கிடைத்தது மட்டுமே அண்ணனுக்கு இந்த வருட ஆறுதல்!



கொல வெறி கய்ஸ்!



இந்த வருடத்தின் 'கொல வெறி’ கிசுகிசு. '3’ என டைட்டில் வைத்ததில் இருந்தே டைட்டடித்தது பிரச்னை. மனைவி ஐஸ்வர்யா இயக்கத்தில் நடித்த தனுஷ§க்கும் ஸ்ருதிக்கும் பத்திக்கிச்சு எனக் கலரடித்தன கவர் ஸ்டோரிகள். 'தனுஷ§ம் ஸ்ருதியும் பார்க்ல இருந்தாங்களாம்... ஐஸ்வர்யா காரை பார்க் பண்ணும்போது பார்த்துட்டாங்களாம்’ என சினிமா ரிப்போர்ட்டர்கள் பரபரப்பானார்கள். 'வலைபாயுதே’ குரூப் நெட்டில் கொட்டடித்தனர். ''தனுஷ§டன் எனக்குக் காதல் என்று வதந்தி பரப்புவோர் மீது சட்டப்படி நடவடிக்கை எடுப்பேன்'' என்று சூடானார் ஸ்ருதி. இந்த மேட்டர்களால் '3’ படத்துக்குச் செலவில்லாமல் செம பப்ளி குட்டி. ''ஒரு இயக்குநரா அந்தக் காட்சி சரியா வந்திருந்தாலும், ஒரு மனைவியா அவங்க நெருக்கத்தைப் பார்த்து ஐஸ்வர்யா கோபப்பட்டது உண்மைதான். மருமகளுக்கும் மகனுக்கும் அப்பப்போ சின்னச் சின்ன சண்டை வரும். அதுக்காக அவங்க பிரிஞ்சிட்டாங்கன்னு சொல்றதுலாம் டூ மச்!'' என்று 'பஞ்சாயத்து’ கஸ்தூரிராஜா வேறு பாலிடாயில் தெளிக்க, 'ஏய்ய்ய் கொமாரு... படம் ஃப்ளாப்புராஆஆஆ...’ என ரிசல்ட் வர, கொல வெறி தணிந்தது!



'ஃபுல்லா குடுத்துரு!’ 



இந்த வருடமும் டாஸ்மாக்தான் மாஸ் டைம்பாஸ். 'புத்தாண்டுக்கு 142 கோடி ரூபாய் மது விற்பனை... இது கடந்த ஆண்டைக் காட்டிலும் 37 கோடி ரூபாய் அதிகம். பொங்கலுக்கு 276 கோடி ரூபாய். இது கடந்த ஆண்டைக் காட்டிலும் 35 கோடி ரூபாய் அதிகம்!’ என்று வருடம் முழுக்க 'வெற்றிக் கொடி கட்டு... லட்சியம் எட்டும் வரை எட்டு’ என அறிவித்துக்கொண்டே இருந்தது டாஸ்மாக் நிர்வாகம். 'பத்தலையே...’ என யோசித்த அரசு, 'அடுத்தது எலைட் பார்’ என்று அறிவிக்க, 'ட்ரீட் எங்க... ட்ரீட் எங்க...’ எனக் குதூகலம் ஆனார்கள் பிரேம்ஜிக்கள். சரக்கில் தண்ணீர் ஊற்றிக் கலப்பட சரக்கு விற்பதைத் தட்டிக்கேட்க விரும்பிய சில போராளிக் குடிமகன்கள் 'கலப்பட சரக்குக்குப் பதில் கள்ள நோட்டு’ என்று இருட்டில் ரவுண்டு கட்ட, அலறியடித்து டாஸ்மாக்கில் கள்ள நோட்டைக் கண்டுபிடிக்க தனிப் படைகளை நியமித்தார்கள். ராமதாஸில் இருந்து வைகோ வரை யார் என்ன சொன்னாலும் 'போங்க பாஸு...’ என லெஃப்ட் அடிக்கும் குடிமகன்களுக்கு ஓர் இடி செய்தி... நாடாளுமன்றத் தேர்தலில் பெண்கள் ஓட்டை அள்ள, 'மதுவிலக்கு’ அறிவிப்பு வரலாம் எனக் கிசுகிசுப்பு வர, 'அப்போ ஃபுல்லாக் குடுத்துரு...’ என எகிறியது விற்பனை!


மிஸ்டர் அந்தர்பல்டி!



இந்த வருடத்தின் 'சினேஏஏஏக் பாபு’, மத்திய அமைச்சர் நாராயணசாமி. ''15 நாள்ல அணு உலை செயல்படும்...'' என இவர் முதல் தடவை சொன்னபோது, நிஜமாகவே டெரராக இருந்தது. அப்புறம், 'அது போன மாசம்... இது இந்த மாசம்’ என அதையே இவர் பேச, 'ஓ... இவரு அவருல்ல..?’ எனக் காமெடிப் பீஸானார். 'கொம்பன் வர்றான்... கொம்பன் வர்றான்...’ என ஆன் தி வேயில் இவர் தட்டிய ஏர்போர்ட் பேட்டிகள் அத்தனையும் காமெடி க்ளிப்பிங்ஸ். ''விமானமே வந்து மோதினாலும் அணு உலை நொறுங்காது!'' என்று பேசிய சூட்டோடு, ''அணு மின் நிலையத்தில் விபத்துகள் ஏற்பட்டால் இழப்பீடு வழங்க மத்திய அரசு 1,500 கோடி நிதி ஒதுக்கி இருக்கிறது'' என்று திகீர் திரி கொளுத்தினார். நாடாளு மன்றத்தில் இவர் வாதிட்ட சட்ட மசோதாவை எம்.பி. ஒருவர் பிடுங்கிக்கொண்டு ஓடியது குபீர் திகீர்! ''பேச்சைக் குறைத்துக்கொள்ளுங்கள்'' என்று கோர்ட்டே காட்டம் காட்டுகிற அளவுக்கு 'கீரிப்பிள்ளை’ காமெடி காட்டினார்!


அம்மம்மா..! 



கடிதம் தட்டுவதில் கருணாநிதி வைத்திருக்கும் கின்னஸ் ரெக்கார்டைக் கைப்பற்றக் கிளம்பினார் ஜெ. நதி நீர் ஆணையத்தைக் கூட்ட வேண்டும், பெண்ணை ஆற்றின் குறுக்கே கர்நாடகம் தடுப்பணை கட்டுவதைத் தடுக்க வேண்டும், முல்லைப் பெரியாறு பிரச்னை, சிங்கள வீரர்களுக்கு சென்னையில் பயிற்சி கொடுப்பதை எதிர்த்து என அடுத்தடுத்து டெல்லிக்கு லெட்டர்கள் தட்டினார். வக்கீல்கள் ஷிஃப்ட் போட்டு வேலை செய்கிற அளவுக்குச் சகட்டுமேனிக்கு சகலர் மீதும் வழக்கு மழை பொழிந்தார். ஒன்றரை வருடத்தில் ஐந்து முறை அமைச்சரவையைக் கலைத்துப் போட்டு கபடி விளையாடினார். 'ஜெ-வின் மனசாட்சி’ என்று வர்ணிக்கப்பட்ட செங்கோட்டையன் முகத்திலேயே புரட்சித் தலைவி பூரான் விட, பன்னீர் பயங்கரமாகப் பம்மினார். உச்சகட்டமாக தமிழக சட்டசபை வரலாற்றிலேயே முதல்முறையாக, சபாநாயகரையே நீக்கி அதிரடித்தார் ஜெ. அத்தனை அமைச்சர் களும் 'தாயில்லாமல் நானில்லை’ என்ற ரிங்டோன்களுடன் சாம்பார் வாளி தூக்கித் திரிகிறார்கள். ''அண்ணா வளைவை இடிப்பதுகுறித்து யாரும் தன்னிடம் கலந்து ஆலோசிக்கவில்லை'' என்று அப்புராணி அறிக்கைவிட்டவர், எம்.ஜி.ஆர். நினைவிடத்தில் மகா மெகா இரட்டை இலையை வைத்தபிறகு, 'அது குதிரையின் சிறகுகள்’ என்று பயாலஜியையே மாற்றி எழுதினார்!


திராணி மேளா!



இந்த ஆண்டும் பொளந்தது இடைத்தேர்தல் காமெடிகள். ''சங்கரன்கோவில் இடைத்தேர்தலில் திராணி இருந்தால் எங்களை ஜெயித்துப் பாருங்கள்'' என்று சட்டமன்றத்தில் சவால்விட்டார் ஜெ. மொத்த அமைச்சர்களும் சங்கரன்கோவிலில் அங்கப்பிரதட்சணம் உருண்டார்கள். சாயங்காலம் தூங்கி எழுந்தவர் மாதிரியே தேர்தலை எதிர்கொண்டார் கருணாநிதி. பிரசாரத்தில் பேசிய விஜயகாந்த், ''நான் மக்கள் பணிகளைப் பார்ப்பதற்காக சினிமாவில்கூட நடிப்பது இல்லை என்பது தெரியுமா?'' என்று கமா போட்டவர், ''எனக்குப் பதிலாக என் மகனை நடிக்க அனுப்புகிறேன்''! என ஃபுல்ஸ்டாப் வைக்க... அரண்டுபோன தொகுதி மக்கள், அ.தி.மு.க-வுக்கு அமோக ஆதரவளித்து தே.மு.தி.க. டெபாசிட்டைப் பறித்தார்கள். இந்திய கம்யூனிஸ்ட் கட்சியின் எம்.எல்.ஏ. மரணம் அடைய, புதுக்கோட்டையில் இடைத்தேர்தல். தா.பாண்டியனைக் கேட்டிலேயே வெயிட்டிங் போட்டு, அ.தி.மு.க. தன் வேட்பாளரை அறிவித்தது அதிர்ச்சிக் காமெடி. ''நாங்க ஆட்டத்துக்கு வரல...'' என கலைஞர் பேக்கடிக்க, ''புறநானூற்றிலே... புறமுதுகிலே...'' என வைகோவும் எஸ்கேப். ''ஏய்ய்ய்... தப்பு... நான் உப்பு வித்தே தீருவேன். ஆங்...'' என அடைமழையில் கேப்டன் களம் இறங்கினார். அமைச்சர்களின் அட்ராஸிட்டி எகிற, ''பப்ளிக்... பப்ளிக்...'' என ஜெயாவே சிக்னல் காட்டினார். அ.தி.மு.க. ஜெயிக்க, தே.மு.தி.க-வுக்கு டெபாசிட் கிடைத்தது ஆறுதல் காமெடி!


கரகர ராஜா!



பாரதிராஜா இந்த வருஷத்தின் கரகர ராஜா. பெப்ஸி ஊதியப் பிரச்னையில், ''என் படத்தை எப்படி எடுக்குறதுனு எனக்குத் தெரியும்!'' என்று தயாரிப்பாளர்களுக்கு ஆதரவாக ஆணியடித்தார். ''நீங்க வரலைன்னா... ஐ பெர்சனலி டூ தட் அன்னக்கொடி... ஆன் மை ஓன் பவர்'' எனத் தன்னிச்சையாக தேனிப் பக்கம் போய் ஆடு மேய்த்தார். ஒரு பக்கம் ஆடுகள் மிரள, இன்னொரு பக்கம் பெப்ஸி தொழிலாளிகள் ஷூட்டிங்குக்கு வராமல் போக, கைகளால் ஆங்கிள் பிடித்துத் தேவுடு காத்தார். தா.பாண்டியனின் பிறந்த நாள் விழா மேடையில் வைகோவை வைத்துக்கொண்டு, ''திராவிடம் பேசிப் பேசி தமிழ்நாட்டையே அழிச்சிட்டாங்க... ஈழத்தையும் அழிச்சிட்டாங்க...'' என பாரதிராஜா கிழக்கே போகும் கிறுகிறு ரயில் ஓட்ட, ''வரலாறு தெரியாமல் பேச வேண்டாம்'' என்று பாரதிராஜாவுக்கு பவுன்சர் வீசினார் வைகோ. இது போக 'அ கொவும் கொ வீயும்’ படத்துக்கு 'அவன் நடிகன்யா’ என்று முதலில் பார்த்திபனை புக் பண்ணினார். சொல்லாமல் கொள்ளாமல் அவரைத் தூக்கிவிட்டு, 'அவன் என் தம்பிய்யா’ என்று அமீருக்குத் தாடியெடுத்தார். அப்புறம் அவரையும் நீக்கி, 'அவன் என் மகன்யா’ என்று கடைசியில் மனோஜுக்கு மேக்கப் போட, 'ஆக்ச்சுவலா அந்தக் கட்டுவிரியனே நீங்கதான்...’ எனப் புலம்பியது பாதிக்கப்பட்ட கும்பல்!


மூன்று கில்லாடிகள்!

இந்த வருடத்தின் செம காமெடி சேஸிங்! திடீரென அ.தி.மு.க-வை விட்டு சசிகலா நீக்கப்பட்டதாக அம்மா அறிவிக்க, 'உய்ய்ய்... உய்ய்ய்... உய்ய்ய்...’ என நாலு ஷோவுக்கு ரெடியானது தமிழகம். முதல் ஷோவாக, ராவணனுக்கு லாடம் கட்டியது போலீஸ். 'போடு தில்லாலே ஆடு தில்லாலே’ என ஜாலியானார்கள் ரத்தத்தின் ரத்தங்கள். அடுத்தடுத்து வழக்குகள் மண்ட, 'சிக்குனான்யா சீஃப்’ என ர.ர-க்கள் ராவாக அடித்தார்கள். அடுத்து பெசன்ட் நகர் பெரியவர் நடராஜனை, சென்ட் அடிப்பதற்கு முன் தூக்கியது போலீஸ். நில அபகரிப்புப் புகாரில் அடுத்த குத்து விழுந்தது திவாகரனுக்கு. போலீஸ் விரட்ட, காரை எடுத்துக்கொண்டு தனியே திவா ரிஷிகேஷ் வரை போக, 'தப்பிக்கிறாராமாம்’ எனப் பொளந்தன காமெடி ஸ்கூப்புகள்.  அம்மா 'பேக்அப்’ சொல்ல, சசிகலா மீண்டும் தோட்டத்துக்குள் வர... கதம்... சுபம்!



''நான் கடுப்பு எம்.ஜி.ஆர்... ஆங்!''



'ரூபம்... ரூபம்... ரூபம்...’ என விஜயகாந்த் விஸ்வரூபம் காட்டியதுதான் இந்த வருடத்தின் சீரியஸ் காமெடி.
'முல்லைப் பெரியாறு, பாலாறு தடுப்பணை என தமிழகத்தின் எந்தப் பிரச்னையையும் தீர்க்க நடவடிக்கை எடுக்காத மத்திய அரசைக் கண்டித்து ஜனாதிபதித் தேர்தலைப் புறக்கணிக்கப்போவதாக’ விஜயகாந்த் அறிவிக்க, 'தலைவர் தல-தளபதி சலூன் நடத்தப்போயிருவாரோ?’ என ஜெர்க் ஆனார்கள் தொண்டர்கள். ''இனி சுட்டுப்போட்டாலும் யாருடனும் கூட்டணி வைக்க மாட்டேன்'' என்று காலையில் கண் சிவந்தவர், ''தேவைப்பட்டால், தி.மு.க-வோடு கூட்டணிவைப்பேன்!'' என்று சாயங்காலமே சைடு வாங்கினார். சட்டசபையில் திடுதிப்பென்று ஆளும் கட்சி ஆட்களைப் பார்த்து கேப்டன் நாக்கைத் துருத்தி 10 நாள் சஸ்பெண்ட் ஆக, நெட்டில் கேப்டன் காமெடிகள் ஹிட்ஸ் அள்ளியது. தே.மு.தி.கழக எம்.எல்.ஏ-க்கள் நான்கு பேர் அடுத்தடுத்து முதல்வர் ஜெயலலிதாவைச் சந்திக்க, கேப்டன் ஷிப்பில் விழுந்தது கெக்கேபிக்கே ஓட்டை. ''துரோகிங்க போனாப் போறாங்க... கோழிங்க என்ன அம்மான்னா கத்துது... கொக்கொக்கொக்னுதான கத்துது...'' என விஜி சளைக்காமல் பவுடர் அடிக்க, பிரேமலதாவும் பண்ருட்டியாரும் ஃபுல் க்ளாப்ஸிலேயே இருந்தார்கள். திடீரென்று விஜயகாந்தே ஜெ-வைப் பார்க்க நேரம் கேட்டுக் கடிதம் கொடுக்க, 'கலாய்ச்சுட்டாராமாம்!’ என ஜாலியானார்கள் தமிழர்கள். உச்சகட்டமாக ஏர்போர்ட்டில், 'நீயா எனக்குச் சம்பளம் கொடுக்குற?’ என்று நிருபரின் கண்ணைக் குத்த, 'விஜயகாந்துக்குச் சம்பளம் கொடுக்கும் போராட்டம்’ என பத்திரிகையாளர்கள் கூட... ஒரே காமெடி சடுகுடு!



ஆக்டரா... டாக்டரா? 




ராமதாஸ்தான் இந்த வருடத்தின் சூப்பர் டிங்கர். டாஸ்மாக்குக்குப் பூட்டுப் போடும் போராட்டத்தைத் தலைவர் அறிவிக்க, ட்ரீட் வைத்து ஆர்ப்பரித்தார்கள் தொண்டர் கள். ''இனிமே திராவிடக் கட்சிகளோட கூட்டணியே கிடையாது. கோ.க.மணி மேல சத்தியம்...'' எனப் பேட்டிகள் தட்ட, ''நாம் ரத்தம் கக்கப்போறது கன்ஃபர்ம்...'' என கிலியானார் கோ.க. ''சென்னை உயர் நீதிமன்றத்தில் இரண்டு நீதிபதிகள் ஓய்வு  பெறுவதால் ஏற்படும் காலி இடங்களில் வன்னியர்களுக்கு முன்னுரிமை கொடுத்து நியமிக்க வேண்டும்'' என்று ஜாதிமல்லி கட்டியவர், அடுத்தடுத்த அழும்புகளில் இறங்கினார். மகாபலிபுரத்தில், ''எவன் கலப்புத் திருமணம் பண்ணாலும் வெட்டுவேன்...'' என்கிறரீதியில் பா.ம.க-வின் 'பொன்னம்பலம்’ காடுவெட்டி குரு பேச... ''வாரே வா... பகுத் அச்சா'' எனத் தொடை தட்டினார் டாக்டர். தர்மபுரியில் ஒரு காதல் ஜோடிக்காக ஊரே எரிக்கப்பட்டது. ''நான் சாதி வெறியன்!'', ''கலப்புத் திருமணங்களை ஆதரிக்கக் கூடாது!'' என்று அய்யா போட்ட ஒவ்வொன்றும் சமூக ஒற்றுமைக்கான வேட்டுகள். ''விடுதலைச் சிறுத்தைகள் ஒரு ரௌடிக் கட்சி'' என அறிக்கைவிட்டு, திருமாவுக்கும் தீப்பொறி திருமுகம் ஆனார். ''திராவிடக் கட்சிகளை அழிக்கவே நான் பிறந்துள்ளேன். இனி, நான் எடுக்கப்போவது புதிய அவதாரம்!'' என்று அய்யா பஞ்ச் அடிக்க, ''இவர் டாக்டர் தாத்தாவா... ஆக்டர் தாத்தாவா..?'' என இமான் அண்ணாச்சி வரைக்கும் காமெடி எகிறியது!



அரியர் தோழர்!

கூடங்குளம் போராட்டம் உச்சத்தில் இருந்தபோது, ''அணு உலை திறக்க வேண்டும்'' என்று தா.பா. சொம்படிக்க, ''போப்பா'' எனப் பொங்கினார்கள் போராளிகள். ''போராடினால் மட்டும் மின்சாரம் வந்துவிடுமா? போராட்டத்தால் என்ன லாபம்?' என்று புதுப் பித்தாந்தம் வாசித்தவர், ''சிறுவாணியில் புது அணையைக் கட்டும் கேரளாவைக் கண்டித்தும், ஐரோப்பாவுக்கு 56 ஆயிரம் கோடி நிதி கொடுக்கப்போவதாகச் சொன்ன பிரதமர் மற்றும் நிதி அமைச்சரைக் கண்டித்தும் ஜனாதிபதி தேர்தலில் இந்திய கம்யூனிஸ்ட் பங்கேற்காது!'' என்று ஒரு சைஸாகக் குழப்பி அடித்துக் குழம்பு ஊற்றினார். ஓசூரில் பெரியார் தி.க-வின் மாவட்ட அமைப்பாளர் பழனிசாமி கொலை வழக்கில், தன் கட்சி தளி எம்.எல்.ஏ. ராமச்சந்திரன் கைதுசெய்யப்பட, ''அய்யய்யோ... ராம்ஸ் ரொம்ப நல்லவருங்க'' என தா.பா. சர்ட்டிஃபிகேட் கொடுத்தது க்ரைம் காமெடி. அப்படியே 'ஸ்டார்ட் மீஜிக்’ என இந்திய கம்யூனிஸ்ட் வரலாற்றில் முதல்முறையாகத் தனது 80-வது பிறந்த நாளை பிளிறலாகக் கொண்டாடினார். ஜெயலலிதா வீட்டுக்கே போய் வாழ்த்த, 'அங்க நான் கால்ல்லி...’ எனப் பரவசமாகிப் பம்மினார். கசாப் தூக்கிலிடப்பட்டபோது, ''ஆமாம், கசாப் ரகசியமாகத்தானே இந்தியா வந்தான். ரகசியமாகத் தூக்கிலிட்டதில் என்ன தவறு?'' என்று லாஜிக் சொல்ல, ஒபாமாவுக்கே கை கால் நடுங்கியது. அரியர் வைத்து அவமானப்படுத்தினாலும் 'அம்மாவே சரணம்’ என்று வருடம் முழுக்க போயஸிலேயே சரணடைந்துகிடந்தார்!



மண்டபம் நிரப்புப் போராட்டம்!



''பாத்துக்க ஜெயிலுக்குப் போறோம்... நாங்களும் ரௌடிதான் நாங்களும் ரௌடிதான்...'' என தி.மு.க. அறிவித்த சிறை நிரப்பும் போராட்டம் இந்த ஆண்டின் காமெடி டாப் டென்னில் உண்டு. நில அபகரிப்பு வழக்குகளில் கே.என்.நேரு, என்.கே.கே.பி.ராஜா என கழகப் புள்ளிகள் பலரையும் பாத்ரூம் போவதற்கு முன் தூக்கியது போலீஸ். உடன்பிறப்புக்கள் டாஸ்மாக்குகளில் ஒளிய, கண் ஆபரேஷன் பண்ணி கால் நீட்டியிருந்தார் ஸ்டாலின். 'கனிமொழி சிறை நிரப்பும் போராட்டத்தில் கலந்துகொள்ளப்போகிறார்’ என செய்தி பரவ, 'கண்ணாவது ஒண்ணாவது’ எனக் களத்துக்கு எகிறி வந்தார் தளபதி. 'நடுவுல கொஞ்சம் அழகிரியைக் காணோம்’ என்று தொண்டர்களைத் தேடவைத்து, சுவிட்ச் ஆஃப் ஆனார் அழகிரி!



''போடுறா... கொல்றா... ஒதரா!''  



2012-ன் அன்னபோஸ்ட் அப்பாடக்கர்கள். 'மசாஜ் எடுத்தோமா, ஞானப்பால் கொடுத்தோமா’ என அமைதியாக வாழ்ந்த மதுரை ஆதீனத்தின் பேட்டையில் கும்மிஅடித்தது கூடா நட்பு. திடுதிப்பென்று நித்தியானந்தாவை இளைய ஆதீனமாக நியமிக்க, 'போடுறா... போடுறா’ எனக் குஜாலானது தமிழகம். ''கனவுல வந்து சிவன் சொன்னாப்ல...'' என அதற்கு 'ஜலக் பொலக்’ விளக்கம் வேறு கொடுக்க, ''கொல்றா... கொல்றா...'' எனக் கொந்தளித்தது தமிழகம். நித்தி பேசுவதற்கெல்லாம், ''தம்பி கருத்தாப் பேசுறாப்ல...'' என ஆதீனம் சோப்படிக்க, ''ஒதரா... ஒதரா...'' என உதறியது தமிழகம். ''ஆயிரம் சந்நியாசிகளைப் பலி கொடுத்தாவது ஆதீனத்தின் சொத்துக்களை மீட்பேன்'' என நித்தி கொமட்டைத் தூக்க, ''தம்பி... ஆர்ம்ஸை எறக்கு... ஆர்ம்ஸை எறக்கு...'' என மிரண்டார் சீனியர். கவலையே இல்லாமல் நித்தி 'ரிங்கா ரிங்கா’ டூரடிக்க, நித்தியின் சூப் பாய்ஸின் கண்காணிப்பில் அச்சப் பேட்டிகள் தட்டினார் அருணகிரி. ''தமிழக அரசுக்கு மதுரை ஆதீனத்தைக் கையகப்படுத்தும் எண்ணம் உண்டு'' என்று அரசுத் தரப்பு வக்கீல் சொன்னதும், ''சாத்தானே அப்பாலே போ'' என நித்தியை டிஸ்மிஸ்ஸினார் ஆதி. அப்படியே வைஷ்ணவி கல்யாணத்துக்குப் போய் அஞ்சு லட்சம் மொய் செய்து, விகடனுக்கு ஜாலி பேட்டி தட்டி செல்ஃப் சேவிங்கிலேயே இருந்தார்!



ரொமான்ஸ் ரௌடி!

சிம்பு போய் பிரபுதேவா வந்தது போன வருஷம். பிரபுவும் போனது இந்த வருஷம். 'ராமராஜ்யம்’தான் கடைசிப் படம் என ஃபேர்வலே கொண்டாடிவிட்டார் நயன். ''ஏழரை மணிக்கு எங்களுக்குக் கண்ணாலமுங்க...'' என பிரபுதேவாவும் பட்டு வேட்டி பர்ச்சேஸ் முடித்தார். சாயங்காலமே, 'அங்கிட்டு பிள்ளைகளப் பாக்க பிரபுதேவா போறாரு... இங்கிட்டு தாரா ராவா அடிக்கிறாங்க’ என்றெல்லாம் சினிமா ரிப்போர்ட்டர்கள் டாப்அப் பண்ண, பணாலானது காதல். ''பிரேமம் முறிஞ்சு போயி... பிரபு ஒரு பிராந்து...'' என அறிவித்தபடியே ஆர்யா வீட்டுக்குப் போனார் நயன்தாரா. 'அடுத்த விக்கெட் ஆர்யா’ என மிஸ்டர் மியாவ் வரைக்கும் போட்டுத்தாக்க, ''ஆமான்டா மச்சான்... இல்லடா மச்சான்'' என விஷால், சிம்பு குரூப்பை வெறுப்பேற்றினார் ஆர்யா. இடையில், ஜெ-விஜயகாந்த் சந்திப்பு ரேஞ்சுக்குத் திடீர் பரபரப்பைக் கிளப்பியது சிம்பு-நயன் மீட்டிங். 'பார்த்துக்கிட்டாங்க... கோத்துக்கிட்டாங்க’ என போட்டோவெல்லாம் வர, 'பார்கே... பார்கே...’ எனக் கொந்தளித்தது கோலிவுட். நீயெல்லாம் இன்னும் நல்லா வருவம்மா!



கலைஞர்... காமெடி வலைஞர்!

''ஆனாவும் வேணாம்... ஊனாவும் வேணாம். பேனாவ மூடுங்க தலைவரே... ஃபேஸ்புக்குக்கு வாங்க...'' என துரைமுருகன் வெற்றிக்குறி காட்ட, எஃப்.பி-யில் அக்கவுன்ட் ஆரம்பித்தார் கருணாநிதி. 'கேகே’யெனக் கிளம்பிய இளவட்டம் கழுவிக் கழுவி ஊற்ற... ஒரே நாளில் லாக் அவுட் ஆனார். ''பெட்ரோல் விலையைக் குறைக்காவிட்டால், கூட்டணியைவிட்டு வெளியேறவும் தயங்க மாட்டோம்'' என்று காது விடைத்தவர், இரண்டு மணி நேரத்திலேயே, ''அப்படிச் சொல்லவே இல்லையே... இது பத்திரிகைகளின் சதி...'' என்று தோசையைத் திருப்பிப்போட்டுக் கருக்கினார். ''கலாம் என்றால் கலகம் என்று பொருள்'' என்று நடுவில் கலாமைக் கலாய்க்க, மூக்கு விடைத்தன முஸ்லிம் அமைப்புகள். ''பொழுது போயிருச்சு... ஒண்ணும் நடக்கலையே...'' எனப் பொட்டு தட்டியவர், 'டெசோ’வில் இறங்க, 'ஈழம் என்கிற வார்த்தையைப் பயன்படுத்தக் கூடாது’ என்கிற மத்திய அரசின் அறிவிப்பைப் பார்த்து அல்லு விட்டார். நடுவில் திடீரென கறுப்புச் சட்டையை மாட்டிக்கொண்டு வந்து, ''காஸ்ட்யூம் சேஞ்ச்...'' எனத் தலைவர் பண்ணியதெல்லாம் அன்பிலீவபிள் காமெடி.



எல்லாம் ஒரு விளம்பரந்தேன்!

சினேகா-பிரசன்னா ஜோடிதான் இந்த வருடத்தின் பப்ளிகுட்டி டார்லிங்ஸ்.
'சினேகாவுக்கும் பிரசன்னாவுக்கும் சம்திங் சம்திங்’ என கொஞ்ச நாளாகவே புகைந்தது. ''ஆமா... அதேதான்'' என இருவரும் ஓப்பன் பேட்டி தட்டினார்கள். இல்லறம் கண்டது ஜோடி. அதுவரை அழகு... வாழ்த்துகள். அப்புறம் இருவரும் அடித்த விளம்பர அலப்பறைகள் அத்தனையும் 'பிச்சு... பிச்சு’ காமெடிகள். திருமண வீடியோவையே தனியார் சேனலுக்கு விற்றார்கள். திடீரென்று, 'சினேகா - பிரசன்னா பிரிவுக்குக் காரணம் என்ன?’ என்று போஸ்டர்கள் பொளக்க, 'அச்சச்சோ... அதுக்குள்ளயா?’ என டாஸ்மாக்கில் கூடிக் குமுறினான் தமிழன். அப்புறம் அது 'ஆடி மாச’ விளம்பர ஸ்டன்ட் எனத் தெரியவர, 'பெட்ரோல் குண்டு வீசிருவோமா...’ என வெறியானான். சாம்பார், ரசப் பொடி, நகை, துணி என்று வெறித்தனமாக விளம்பரங்களில் வர ஆரம்பிக்க... ''இவங்க கல்யாணமே ஒரு விளம்பரம்தானோ?'' எனத் தலைகீழ் டவுட்டு சிரசாசனத்திலேயே இருந்தான் தமிழன்!



ஹி இஸ் வெயிட்டிங்!

எஸ்.ஏ.சி-தான் இந்த வருடத்தின் புஸ்ஸ்ஸ்ஸ்.ஏ.சி!
ஜெயலலிதா ஜெயித்ததும் ரவுண்டு கழுத்து பனியனோடு விஜய்யை அழைத்துக்கொண்டு பொக்கே தட்ட கார்டனுக்குப் போனார். ''யாரு... மணப்பாற சுப்பிரமணியா?'' என ஜெ. கேட்க, அரசியல் புரிந்து பொறி கலங்கினார் புரட்சி இயக்குநர். தயாரிப்பாளர் சங்கத் தலைவர் சேரில் அமர்ந்தது என்னவோ பக்கா... அடுத்தடுத்த பஞ்சாயத்துக்கள் அவரை ஆக்கியதே சுக்கா. எதிர் அணியில் சுமார் 200 தயாரிப்பாளர்கள் குரூப் கட்டி, 'அதுக்கெல்லாம் அவர் சரிப்பட்டு வர மாட்டாருங்க...’ என டவுசரைக் கிழிக்க, 'சட்டம் ஒரு இருட்டறை’ டி.வி.டி-யைப் பலமுறை பார்த்து மயக்கமாகியிருக்கிறார்.
ஒரு பாடல் வெளியீட்டு விழாவில், 'விஜய் ஒன்றும் அழகான ஹீரோ இல்லை’ என்று பேசிவைக்க, வீட்டில் டின்னரை கட் பண்ணியிருக்கிறார்கள். துப்பாக்கி - கள்ளத் துப்பாக்கி டைட்டில் விவகாரத்தில், கள்ளத் துப்பாக்கி படத் தயாரிப்பாளர் ரவிதேவன், 'எஸ்.ஏ.சி. என்னைக் கொலை செய்யறதா துப்பாக்கி காட்டி மிரட்டுறாரு’ என்று எஸ்.ஏ.சி. மீது போலீஸில் புகார் கொடுக்க, 'யாரு... நானு... துப்பாக்கியக் காட்டி... மூலிகை ஆயில் எங்கங்க கிடைக்கும்?’ எனப் பேசி பிரச்னையை முடித்தார் டாடி!



கிளாமர் தாதா!

கடந்த ஆண்டு பாலியல் குற்றச்சாட்டு வழக்கில் பிஸி யான புவனேஸ்வரிக்கு இந்த வருஷம் என்ன வேலை என ஆவலோடு காத்திருந்தான் தமிழன். சும்மா இருப்பாளா சுகுமாரி..? நடிகை ஆக்குவதாகச் சொல்லி 40 லட்சம் மோசடி, ஃபைனான்ஸ் வாங்கித்தருவதாக மோசடி, கார் வாங்கியவரிடம் பணம் செட்டில் செய்யாமல் கொலை மிரட்டல் என 10-க்கும் மேற்பட்ட 'சமூகசேவை’ வழக்குகளில் சிக்கி லைட்டடித்தார் புவனேஸ்வரி. ஹை லைட்டாக கிழக்குக் கடற்கரை சாலைத் தகராறில் சமாதானம் செய்ய வந்த போலீஸையும் பொளக்க, 'புட்றா... புட்றா’ என விரட்டியது காக்கி. புவாவுக்கு இப்போ புவ்வா ஜெயிலில்!



ஈமு சாப்பிடு மாமு!  

2012-ன் கொக்கரக்கோ காமெடி. 'ஈமு கோழி... சாப்பிடு மாமு’ என்று ரியல் எஸ்டேட் நிறுவனங்களுக்குப் போட்டியாகக் கிளம்பியது இந்தக் கோழி பிசினஸ். கடை திறக்க நமீதா வர, 'கோழியப் பாக்கறதா கொமரியப் பாக்கறதா...’ எனக் கும்மியடித்தது ஜனம். சினேகா, சத்யராஜ், பாக்யராஜ், சரத்குமார் என எல்லா சமூக சேவகர்களும் விளம்பரத்தில் வூடுகட்ட, பிச்சுக்கிச்சு பிசினஸ். சேலம், ஈரோடு, நாமக்கல், திருப்பூர் பக்கம் இருந்த நூற்றுக்கணக்கான பண்ணைகளில் தங்க நாணயத் திட்டம்... அது இதுவென வரிசை கட்டிய வாடிக்கையாளர்களை மொட்டை அடித்தார்கள் ஈமு மாமூக்கள். சுமார் 20 ஆயிரம் பேரிடம், 500 கோடிக்கும் மேல் சுருட்டினார்கள். இரை இல்லாமல் பசியால் ஈமு கோழிகள் செத்தது பெரும் துயரம்!



2012ன் டாம் அண்ட் ஜெர்ரி!



மாற்றான்களாக வளைய வந்த வைகோ - நாஞ்சில் சம்பத்துக்கு நடுவிலான உள்குத்து 2012-ன் காமெடிக் குத்து. ''ஆலம்பனா... நான் உங்கள் அட்ட்ட்டிமை...'' என விளக்கு பூதம் மாதிரி வைகோ-வின் பின்னால் திரிந்த சம்பத், திடுதிப்பென ஸ்க்ரூ கழட்ட, கழன்றது உறவு. ''பல பிரச்னைங்க... வைகோ அய்யா உள்ள வரும்போது, 'ம்மேஏஏஏ...’னு கத்திக்கிட்டே சம்பத் வெளிய போவாரு. அவரு பேசும்போது இவரு, 'ஹல்லோ... ஹல்லோ... சித்தன் சவுண்ட் சர்வீஸ்’னு குரல் கொடுப்பாரு. பல பிரச்னைங்க...'' எனத் தார் பூசியது தாயகம் வட்டாரம். 'என்னை வேலைய விட்டு நீக்குங்கடா... கப்பல்ல வேல கிடைச்சுருக்குடா...’ என சம்பத்தின் சலம்பல் உக்கிரமாகவே, 'சங்கொலியில்’ ஜாடையாகச் சாணி அடித்தார் வைகோ. 'அங்க போவாரு... இங்க போவாரு’ பூச்சி காட்டிய நாஞ்சில், அம்மா கட்சியில் வளைந்து கும்பிட்டபடி கூட்டுப் பொரியல் வாங்கினார். குரு வழக்கம்போல வாக்கிங் கிளம்ப, ஜெ. கொடுத்த இன்னோவாவில் பழிப்பு காட்டியபடி பயணம் போகிறார் சிஷ்யன்!



'பாதாள பைரவி’ பார்ட் டூ!

இந்த ஆண்டின் செம கெடா வெட்டு, கிரானைட் பி.ஆர்.பி-க்குத்தான். மதுரை கலெக்டராக இருந்த சகாயம் வீசிய அணுகுண்டில், நொறுங்கியது பி.ஆர்.பி. கோட்டை. சகாயத்தின் ரகசிய அறிக்கை லீக் ஆக, பி.ஆர்.பி-யில் இருந்து துரை தயாநிதி வரைக்கும் சிக்கிச் சிதைந்தார்கள். தலைமறைவான பழனிச்சாமி டெல்லி வரைக்கும் உருண்டுவிட்டு, 10 நாள் தாடியோடு, 'அய்யா கும்புட்டுக்கறேன்...’ என சரண்டர் ஆனார். அப்புறம்தான் அதிர்ச்சிக் காமெடிகள். 'அய்யா... என் கிணத்தைக் காணோம்’ மாதிரி 'அய்யோ... எங்க ஊரு கண்மாயைக் காணோம்... மலையைக் காணோம்’ எனக் கிளம்பி வந்தார்கள் நாட்டாமைகள். தென் மாவட்டங்களில் வருவாய்த் துறையின் பியூனைக்கூடத் தூங்கவிடாமல், விடிய விடியக் கணக்கெடுத்ததில்... ஏகப்பட்ட சுரண்டல்கள் அம்பலமாயின. பல கண்மாய்களைத் தோண்டி எடுத்து, அதன் மீது கிரானைட் கழிவுகளைக் கொட்டிக் கட்டடங் களையே எழுப்பிவிட்டார்கள். பி.ஆர்.பி. கைதுக்குப் பிறகு நடந்ததெல்லாம் 'பாதாள பைரவி’ பார்ட் டூ!



தமிழகத்தைத் தாக்கரே!

'முஷ்டி முறுக்கும் அண்ணனின் புகைப்படத்தைத்தான் சுவரொட்டியில் பதிக்க வேண்டும்’ என்பதுபோல, 'நாம் தமிழர்’ கட்சியின் 'கண்டிஷன்ஸ் அப்ளை’கள் வெளியாக, இணையத்தில் எகிறி எகிறி கமென்ட் போட்டார்கள். வேளாங்கண்ணிக்கு இலங்கையில் இருந்து வந்தவர்களின் வாகனங்களை சீமான் ஆட்கள் வெளுக்க, 'அடிவாங்கியவர்களில் இலங்கைத் தமிழர்களும் உண்டு’ என்று விவகாரம் கிளம்ப, சீற்றத்தைக் குறைத்து சைலன்ட் மோடுக்குப் போனார் சீமான். 'பெரியாரால்தான் தமிழன் கெட்டான்’, 'திராவிடத்தால்தான் தமிழகம் நாசமானது’ என 'ஹய்யோ ஹய்யோ’ ஆவணத்தை சீமான் வெளியிட, கோவணத்தைக் கிழித்துத் தோரணம் கட்டினார்கள் பெரியார் தொண்டர்கள். கேட்ட கேள்விகளுக்குப் பதில் சொல்ல முடியாமல், ''ஆவணமா, அப்படியா, வந்துடுச்சா? அதுக்குள்ளேயேவா?'' என்று பிதுங்கிப் பிதுங்கிப் பேஸ்த்தடித்தார். ''கொளத்தூர் மணி விமர்சிக்கிறாரே, வைகோ கண்டனம் தெரிவிக் கிறாரே'' என்று கேள்வி கேட்டால், ''நான் பெரியாரின் பேரன்தான், கொளத்தூர் மணி என் அண்ணன்தான்'' என்று கூச்சப்படாமல் 'குடும்பப் பாட்டு’ பாடினார் சீமான்!


அன்லைக்!

சிட்டி சென்டர் ரவுண்ட்அப் முடிந்தும் பாடகி சின்மயிக்குப் போரடிக்க, ட்விட்டரில் பொங்கல் வைத்தார். 'மீன்களை மீனவர்கள் கொல்றாங்கோ... மீனவர்களை இலங்கைக் கப்பல் படை கொல்லுது. இதுல என்ன தப்பு’ என்கிறரீதியில் அவர் ட்விட்டியதாகச் செய்தி கிளம்ப... கொந்தளித்தார்கள் இணையப் புரட்சியாளர்கள். 'சின்னாத்தா... இப்ப வந்து பதில் சொல்லு மங்காத்தா’ என வம்படி கமென்ட்டுகள் வலை போட்டு இழுக்க, போலீஸ் கமிஷனரிடம் வந்து 'மசாலா தடவுறாங்கோ... மசாலா தடவுறாங்கோ’ எனக் கூவினார். உடனே, ட்விட்டர் கரடிகளுக்குக் காப்புப் போட்டது போலீஸ். ''நான் தமிழர்களுக்கு எதிரானவ இல்லை. மறவர் சீமையில் தமிழ் வளர்த்த குடும்பப் பெண்...'' என சின்ஸ் பன்னீர்க் காவடி தூக்க, ''ராஜன் லீக்ஸுக்கு சஸ்பெண்ட் ஆகிருச்சு...'' எனப் பால் காவடி எடுத்துவந்தது எதிர் குரூப். நடிகர் சிம்பு திடீரென எதிர் சந்தில் ஓடி வந்து, ''என்னைக்கூடத்தான் காமெடி பண்றாங்க... மிமிக்ரி பண்றாங்க. நாங்க எல்லாம் கூலா இருக்கோம்ல. இதை எல்லாம் அப்படியே விட்டுறணும்...'' என்று சின்மயிக்கு அட்வைஸ, ''ஊர்க்கட்டு சொல்லிருச்சு... நகரு நகரு...'' எனக் கலைந்தது கூட்டம்!



பகீர்... திகீர்... டகீர்!

இந்த வருடம் வதந்தி வருடம்... 'அஸ்ஸாமில் சிறுபான்மையினர் தாக்கப்படுவதற்குப் பதிலாக, இங்கே உள்ள வடகிழக்கு மாநிலத்தவரை சிறுபான்மையினர்கள் தாக்கப்போகிறார்கள்’ என டெரர் ரூமர் கிளம்ப, வட மாநிலத் தொழிலாளர்கள் கூட்டம் கூட்டமாக ரயில்வே ஸ்டேஷன் களில் எகிற ஆரம்பித்தார்கள். 'ரம்ஜானுக்கு மெஹந்தி வைத்துக்கொண்ட பெண் ஒருவர் இறந்துவிட்டார்’ என்று கிளம்பிய வதந்தியால், மெஹந்தி பார்ட்டிகள் மிரண்டார்கள். கிருஷ்ணகிரி - தர்மபுரி ஏரியாவில், 'மருத்துவமனையில் பிறந்த குழந்தை ஒன்று, பிறந்த உடனேயே பிரசவம் பார்த்த டாக்டரைப் பார்த்துக் கண்களை உருட்டி, 'நாலாயிரம் குழந்தை களைப் பழிவாங்காம விட மாட்டேன்!’ என்று தெலுங்குப் பட ஸ்டைலில் மிரட்டியது எனக் கிளம்பிய வதந்தியால் ஃபுல் த்ரில்லானது தமிழகம்!





நன்றி - விக்டன்